قلب ابيض

جربت كل يوم الصبح قبل ما تغسل وشك 

تبص بصايه على قلبك 

مش يمكن محتاج حبة نضافه هوة كمان 

انا جربت 

جربت مرة ازعل واتدايق من الناس اللى بحبهم علشان تصرفاتهم اللى بتدايق 

وصحيت الصبح بصيت على قلبى لاقيته مش نضيف 

حسيت ان فيه حاجه كابسه على نفسى 

وعلشان كده قررت انضفه 

تبت واستغفرت 

لاقيته لسه مش نضيف 

قررت اسامح اللى دايقونى 

لقيته نضف بس لسه مش اوى 

مش بيلمع 

رحت مصليه ركعتين ودعيت لهم مش عليهم 

دعيت لهم ان ربنا يحققلهم كل اللى بيتمنوة 

وان كانوا غلطوا فى حقى فانا مسامحاهم 

بعديها حسيت انى مستريحه 

***************

ممكن ناس تكون بتحبهم ويقولوا عليك كلام ميعجبكش ومش فيك اصلا 

ممكن تدعى عليهم 

وممكن مش تسامحهم 

وممكن تكرههم 

بس يفيد بايه كرهك ليهم 

غير ان قلبك يبقى مش نضيف 

الاحسن  

تسامح و تغفر و تستمتع بنضافه قلبك 

*****************

احيانا بفكر واقول 

هوة انا مثلا احسن من ابى بكر الصديق؟ 

ولا ربنا  هيحبنى اكتر منه ؟

لا طبعا 

طب اللى الناس بيعملوه معايا اسؤا من اللى الناس عملوه معاه ؟

برده لا طبعا  ولا ييجى فتفوته حتى 

طيب سيدنا ابو بكر الصديق ايه اللى حصله ؟

ابن خالته اللى كان سيدنا ابو بكر بينفق عليه واسمه مسطح بن أثاثة

كان ضمن الناس اللى اتهموا بنته السيده عائشه فى شرفها ايام حادثة الافك

شوفتوا حاجه اسؤا من كده 

يعنى متمرش فيه العيش والملح 

لا وكمان بيفترى على زوجه النبى وقريبته 

و يتهمها باسؤا اتهام على وجه الارض 

لو حد فينا مكان سيدنا ابو بكر كان هيعمل ايه 

ممكن يقتله اققل واجب 

او يدعى عليه ان ربنا ينتقم منه 

او يبعد عنه ومش عاد يديله فلوس لا هوة ولا اى حد من طرفه و ده يكون اقل اقل اقل ما يمكن عمله صح 

لكن بعد ما ربنا سبحانه وتعالى اثبت براءة السيده عائشه بنفسه 

و نزلت الايه الكريمه اللى علمهالنا الرسول 

" وَلْيَعْفُوا وَلْيَصْفَحُوا أَلَا تُحِبُّونَ أَنْ يَغْفِرَ اللَّهُ لَكُمْ وَاللَّهُ غَفُورٌ رَحِيمٌ "

اول ما سمعها سيدنا ابو بكر قال "  (بلى يا رب إني أحب أن يغفر لي ) 

وفى ساعتها سامحه ومش بس كده لا ورجع  ينفق عليه هوة واهله زى الاول كمان 

بالبساطه ديه 

اه بالبساطه ديه 

علشان 

احلى نومه تنامها لما مش تكون متدايق من حد 

لما تكون حاسس ان قلبك قلب ابيض 

علشان كده بعلن لكل الدنيا 

اللهم انى عفوت عن كل من ظلمنى 

و غفرت لكل من اساء الى 

اللهم انى احب كل من امن بك فيك 

فارحمنا جميعا 

واغفر لنا جميعا 

وارزقنا جميعا سعادتى الدنيا والاخرة 

************

سهل اوى انك تدعى على الناس اللى بتزعلك 

و صعب اوى انك تدعيلهم 

سهل اوى انك تلاقى الف سبب علشان تتضايق او تزعل من اى حد 

وصعب اوى انك تلاقى سبب واحد يخليك تسامحهم 

سهل اوى انك تلاقى الف مبرر يثبتلك ان الناس وحشه 

وصعب اوى انك تحاول تدور الاول فى نفسك على الاخطاء اللى عملتها

واللى خليتهم يعملوا كده معاك 

سهل اوى انك تلاقى الاخطاء والعيوب 

وصعب اوى انك تلاقى المميزات و الجوانب الايجابيه 

لو ناوى تعمل السهل !!!!!!!

مش هتخسر الا نفسك 

هتلاقى قلبك مليان كرة يغرق الكرة الارضيه 

هتلاقى روحك باليه جامده واحتمال متلاقيهاش اصلا 

هتلاقى الف سبب يخليك تغلط ما الناس كلها وحشه 

وهتلاقى الف مبرر يساعدك انك تعمل اخطاء زياده 

وقلبك هيبتدى يتملى بامراض تانيه والعياذ بالله زى الحقد والحسد 

وهيبقى قلبك قلب اسود وريحته وحشه كمان 

لكن لو جربت تعمل الصعب 

هتتعب شويتين فى البدايه 

لكن هتلاقى قلبك مطمن ونايم مرتاح البال 

هتلاقى كل الناس بتحبك 

وهتحس انك بتحب كل الناس 

هتلاقى الدنيا حلوة وكل الناس صالحين 

ومليانين بالخير 

فتحاول تصلح نفسك دايما و تنمى جوانبك الايجابيه 

وهتلاقى حلاوة اخلاقك تدوب فيك كل الناس 

مش الناس بس: الناس والملايكه وربنا كمان 

وقلبك هيبقى قلب ابيض صافى منور وريحته زى الياسمين 

والله ما فى احلى من كده 

حديث بحبه اوى من وانا صغيرة 

قال أنس بن مالك رضي الله عنه كنا جلوسا مع رسول الله ( ص ) فقال يطلع عليكم الآن رجل من أهل الجنة فطلع رجل من الأنصار تنطف لحيته من وضوئه قد تعلق نعليه في يده الشمال فلما كان الغد قال النبي ( ص ) مثل ذلك فطلع الرجل مثل المرة الأولى فلما كان اليوم الثالث قال النبي ( ص ) مثل مقالته أيضا فطلع ذلك الرجل مثل حاله الأولى فلما قام النبي ( ص ) تبعه عبد الله بن عمرو بن العاص فقال إني لاحيت أبي فأقسمت لاأدخل عليه ثلاثا فإن رأيت أن تؤويني إليك حتى تمضي ( وفي رواية حتى تحل يميني ) فعلت قال نعم قال أنس وكان عبد الله يحدث أنه بات معه تلك الليالي الثلاث فلم يره يقوم من الليل شيئا غير أنه إذا تعار وتقلب على فراشه ذكر الله عز وجل وكبر حتى يقوم لصلاة الفجر (فيسبغ الوضوء ) قال عبد الله غير أني لم أسمعه يقول إلا خيرا فلما مضت الثلاث ليال وكدت أن أحتقر عمله قلت يا عبد الله إني لم يكن بيني وبين أبي غضب ولاهجر ثم ولكن سمعت رسول الله ( ص ) يقول لك ثلاث مرار يطلع عليكم الآن رجل من أهل الجنة فطلعت أنت الثلاث مرار فأردت أن آوي إليك لأنظر ما عملك فأقتدي بك فلم أر تعمل كثير عمل فما الذي بلغ بك ما قال رسول الله ( ص ) فقال ما هو إلا ما رأيت ( فانصرفت عنه ) قال فلما وليت دعاني فقال ما هو إلا ما رأيت غير أني لاأجد في نفسي لأحد من المسلمين غشا ( وفي رواية غلا ) ولا أحسد أحدا على خير أعطاه الله إياه فقال عبد الله هذه التي بلغت بك وهي التي لانطيق .

يا رب طهر قلوبنا من كل امراض القلوب 

واحفظها لنا طاهرة نقيه ثابته على دينك 

ابد الدهر